ika-1 ng Pebrero
Ang Quiz
Maligayang unang araw ng Pebrero! Sa totoo lang, inis na inis ako ngayong araw na ‘to. Pa’no ba naman, dahil alam kong magkakaroon kami ng quiz sa Biochem ngayon sa lektyur, literal na buong gabi akong nag-aral para doon, buong gabi, maniwala ka. Naabutan pa kong gising ng mga manong na naboblower ng kalat sa labas ng dormitoryo na nagmamarka na isang panibagong araw. E alas otso ‘yong klase ko. So umidlip ako sandali, tapos oras na minulat ko ang mga mata ko, 7:50 am na! Ginising pa nga ako ng roommate ko at sinabi saking maglagay na lang ako ng sapatos at humagibis sa pagtakbo. Edi nagsipilyo ako at dali-daliang naghilamos. Tapos, sa pagdampi ng malamig na tubig sa pagmumukha ko, naisip ko, siguro wala rin namang kuwenta kung pupunta pa ‘ko kasi oras na makarating ako doon, tapos na ‘yong quiz. Kaya paglabas na paglabas ko ng banyo, naglakad ako papuntang mesa, umakyat sa aking kama, at niyakap ang aking malambot na malambot na unan. Bahala na. Natulog akong muli sa abot ng aking makakaya. Pagkagising ko naman, sukdulan ang pagkainis ko sa sarili ko. Kasi parang na-realize ko, kung kelan ba naman malinaw na inihayag ng prop na magkakaroon ng quiz (madalas kasi sorpresa), doon pa ko hindi nag-aral ng maaga at natulog ng maaga. Nakakasira talaga ng araw. Hay nako.
Magpatuloy sa pagbasa →